في ظلّ أزمة التعليم التي اشتدّت منذ أشهر نتيجة خلاف بين نقابة التعليم الثانوي والتي يمثلها، لسعد اليعقوبي ووزارة التربية التي يمثّلها حاتم بن سالم، نشرت أستاذة التعليم الثانوي بسمة رزقي تدوينة مؤثرة على حسابها الرسمي فيسبوك
وقالت الأستاذة: “سنة دراسية ضاعت موش نهاية العالم ولو أنها تكلفت للوالدين شحم يهود كيف ما يقولو …لكن كيف نشوف اولادنا ضايعين في الشوارع هذا خطر كبير
مازلت كيف حضرت على منظر ابكاني و جعلني ألعن نفسي و الاساتذة و النقابة و الاتحاد و الوزير و الدولة…تلاميذ كولاج بجانب مقر سكني خرجو العاشرة صباحا محتجين غير راغبين في الدراسة و تقوم عركة بينهم و بين مندسين كلوشارات و بدا التراشق بالحجارة و البنات تصيح و تجري يحبو يتخباو و المارة لحقهم طش الحجارة و بعض السيارات تهشمت و تخلط الشرطة لتلاحقه
كأستاذة نقول للنقابة ماعادش حاجتي بتحقيق مطالبي قدام الي صاير لاولادنا راهم ضاعو راهي الحرابش تتباع قدام الكولاجات و المعاهد كيف الحلوى…راهو حتى التلميذ الباهي مشى في الساقين ودخل الفساد من بابه الكبير
صيحة فزع اطلقها لكل من له ضمير حي و يخاف على مستقبل اولادنا و بلادنا…فلنعد للتدريس واجراء الامتحانات ونرمم ما بقي بأخف الاضرار …و حسبي الله و نعم الوكيل في الي كان السبب
